الفنان دينزل واشنطن،اللى اخد الأوسكار مرتين ..

تعالوا نعرف مع بعض مين هو الفنان دينزل واشنطن،اللى اخد الأوسكار مرتين .. 

النجم الأسمر اللى ساب الطب عشان التمثيل ، هو مش مجرد ممثل، ده أسطورة بجد بمعنى الكلمة. حياته مليانة كفاح، نجاح، وتميّز على مدى أكتر من 40 سنة في السينما. .دينزل واشنطن اتولد يوم 28 ديسمبر 1954 في ماونت فيرنون، نيويورك. أمه كانت بتشتغل في صالون تجميل، وأبوه كان قسيس.

لما كان عنده 14 سنة، أهله انفصلوا، وده أثّر عليه . أمه ودّته مدرسة عس*كرية علشان يركز على حياته ويبني شخصيته.

الحياة العس"كرية خليته منضبط و شاطر ومجتهد، وكان في البداية هيدرس الطب، لكنه غيّر رأيه ودخل مجال الصحافة، وبعدها حب التمثيل ودخل عالم المسرح.

بدأ دينزل واشنطن رحلته الفنية بأدوار صغيرة، زي أول فيلم تلفزيوني له "Wilma" سنة 1977، وبعدها فيلمه السينمائي الأول "Carbon Copy" سنة 1981.

و بعدها انطلق للعالمية بأدوار قوية وأفلام مميزة مع مخرجين كبار زي سبايك لي وأنطوان فوكوا و رايدلى سكوت.

دينزل واشنطن قدم أدوار متنوعة ما بين الأكشن، الدراما، والكوميديا، وأثبت إنه ممثل متكامل قادر يتقمص أي شخصية .. كل شخصياته مختلفه كده عن بعض .. تحسه كده كأنه أحمد ذكى هوليوود .

اخد ول أوسكار سنة 1990 كأفضل ممثل مساعد عن فيلم "Glory". دوره كان جندي أسمر في الحرب الأهلية الأمريكية و كان دور مؤثر جدًا وخطف الأنظار.

الاوسكار الثانية سنة 2002 كأفضل ممثل رئيسي عن فيلم "Training Day". دوره كان شرطي فاسد وهو دور قوي جدًا ومختلف تمامًا عن أي حاجة قدمها قبل كده.

اما بقى ادواره التانية اللى اترشح فيها لجائزة الاوسكار فتدرس الصراحة .. زى دوره فى مالكوم إكس البطل الأسمر المسلم اللى كافح ضد العن*صرية و بذل حياته عشان الحب و التسامح و اللى الفيلم كان على اسمه "Malcolm X" او حتى دوره فى فيلم "The Hurricane" الادوار دى كانوا قريبين جدًا من الفوز بالأوسكار، لكنه ماكسبهاش.
أداءه كان أسطوري فى فيلم ايكوليزر Equalizer بجزئيه الاول و التانى ، اللي بيجمع بين الأكشن و الدراما والإثارة.

و كمان كان ليه تجربة اخراج و الفيلم كان من بطولته اسم الفيلم Fences (2016) ، وكان من أقوى أفلامه الدرامية.
اما بقى فيلم .. American Gangster .. فعمل فيه دور زعيم مافيا أسمر في نيويورك، وأداءه كان لا يُنسى.

دينزل واشنطن فاز ب 3 جوائز جولدن جلوب، وجائزة توني للمسرح.

و في 2016، حصل على جائزة سيسيل بي دوميل للإنجاز مدى الحياة.

و في 2022، أخد وسام الحرية الرئاسي، وده يعتبر تكريم كبير جدًا لشخصه و مساهماته .

دينزل واشنطن أعلن إنه قرب يعتزل، لكنه مش هيخرج من الساحة غير لما يسيب بصمته الأخيرة.

عنده دور جديد في فيلم "Black Panther 3" مع المخرج رايان كوجلر، وده يعتبر حلمه الأخير في السينما.

و كمان بيخطط لتقديم مسرحية "Othello" على برودواي سنة 2025، وهي أول مرة يقدم فيها الدور ده.

دينزل واشنطن معروف بجديته والتزامه، لكنه شخص متواضع جدًا وبيهتم دايمًا بتقديم أدوار ليها رسالة وبتسيب أثر في الجمهور.

دينزل واشنطن هو واحد من أعظم الممثلين في تاريخ السينما، واعتزاله هيكون خسارة كبيرة، لكنه سايب بصمة مش ممكن تتنسي.

قولولنا ايه اكتر فيلم بتحبه لديزيل واشنطن
وماتنسوش الايك والشير

ديسمبر 13, 2024